2Cor 13 | ASO | STEP | Lengita alosa nouvoni' meve nene gamene sitohamo ivosa alosuuve. Ido' ogo gonitine geleloni' nene mono' godolou' ti' li gizi nizado' nene do molosa gele-lengedelesuve: Gamazi gono nidavo lihime dave'mi monovo li soto' ilizave nene sitape sitohamope ne'minete mini hamo' gamazivo' likevosavo' nene lamineto' likeve li gili ele'vole' ilisave.

2 Corinthians 13

Lengita Ogo Gonitine Gelo Isetine Izamo Lihime Dave Nene Lihime Lengemelone' Nenaze. Monovotine Di Lisihe' Ilizave Lo Lo-ngedosa Geke' Lo-ngedo Paulo' Gamazi've Gize Osu' Line' Gamazi

1 Lengita alosa nouvoni' meve nene gamene sitohamo ivosa alosuuve. Ido' ogo gonitine geleloni' nene mono' godolou' ti' li gizi nizado' nene do molosa gele-lengedelesuve: Gamazi gono nidavo lihime dave'mi monovo li soto' ilizave nene sitape sitohamope ne'minete mini hamo' gamazivo' likevosavo' nene lamineto' likeve li gili ele'vole' ilisave. 2 Nemu' nene gomu' lengikisi gamene sita' vo minuvoni' gamenela nene lihime gomu' dani' alevesi ido' evene' linge mukikisi lo-lingimuvoni' gamazi nene idise lengikisi minamuvongu' nene gohi ti' lo hungo' molo nolo-lingimuve: Gohi aloni' nene isetine mo keke' izamolosuve. 3 Ne'mine oloni' nene Kilisito' nene nenita mine molo neivosa gamazi noluve noluvoni' nene mo lamineto' noluvoni' monovo lengelebizelongumu' nene lingine nilani' nenako nemu' naza ne'mi monovo do soto' ogo lengelebizeloni' nene isetine izamolosuve. Ee, Kilisito' lengito' gono daa' neine' nene gilizevo ogo daa' neivoba asi lengi' vovotingu' nene amuzo molo gono do minaa' neine' ma neive. 4 Lamineto' aza nene gilizevo ne'mine lolo' ogo neido' nene lohoto' zalo' bilani'za O'moso'mi amuzo eita gono do minine' ne'mo nene gohi vele gizo minevo' dovo' ogo neive. Ee, laza nene eikisi a'mine'mine ogo gilizevo ogo none'za O'moso'mi amuzo lelita gono ha do neine' ne'mo nene ezesi vete gizo minevo' dovo' ogo mino lengikumu' ve losa nene gono dalosune.

5 Lamineto' lingine nene mo mono' lulou' nene nizahe nizamahe ne'mi monovo di soto' ilisa langisetine monovotine nene emengu' mili ize' mili di ningilo. Lengi' lutingu' lutingu' Kilisito' mine molo neingumu' nene langisetine nene gili guni amahe. Ee, lingine nene O'moso'mo ninge mate-lengedelido' minamavo ma nene mo lamineto' Kilisito' nene lengi' lutingu' mine molo neive. 6 Ido' ne'mine o neinako lingine leli' ningavoo O'moso'mo ninge mate-ledamivo ha gono dalonido' minelesune losa nogiluve. 7 Laza lengikumu' nene monovo goloso hamokisi nene ma damilizahoo lo O'mosola laa' noune. Ido' ne'mine lo O'mosola laa' noune' nene lingine monovo goloso damii minikevo O'moso'mo leli' nene ningaavo gono dalonido' lisihe' o none' nene soto' ogo minelingumu' ve losa nene ma losa'mune. Asi leli' nene O'moso'mo ninge mate-ledavoo gono dalonido' lisihe' amune' gele noline' nevosi nene alamo lingine monovo lisihe' laminekovo' igi mili minilizangumu' ve losa nene laa' noune. 8 Ido' ne'mine noluvoni' nene laza inite' ma oloningu' nene gamazi gihile belo do'mo leme-deline' inite' nene mo keke' ngelo ma amolosune. Asi gamazi gihile hize ele' iline' initekovo' nene olosuunako nemu' nene noluve. 9 Ee, lingine monoku' amuzo mili minaa' ani' ne'mo nene laza amuzote do soto' olone' akate nomivosa gilizevo ogo minaa' olone' gamene muki' nene lolize izo minaa' noune. Ido' ma neemukisi nene O'mosola laa' noune: Ado' lengi' nene mudise di lisihe' igi minilizave losa nene laa' noune. 10 Ido' naza lengita olihe amo mino ne'mine gamazi mene nogize-lingiduvoni' nene lengita alongu' nene Guvelesi ve'mo neme neine' amuzo nene do soto' ogo lingine dovo gizevo' ogo lengelemalove lo gele minosa nene nogize-lingiduve. A'mine amuzo nimine' nene monoku' do'mo leme-lengedelongumu' ve losa nevoba asi do'mo dize-lengedelongumu' ve losa nene nimine' ve.

11 Neze zuhokizo, gamazi gize osu' lolosa lumola mene ti' lo nolo-lingiduve: Longolize izisa minilo. Ido' monoku' nene di lisihe' i'mi dizi minilo. Naza gamazi luvoni' mene gili diisa minilo. Ido' lutine gatine've nene hamoli'minevo' minivosavo' nene minilo. Ido' lengiku' nene hongu li laminiivo' minilo. Ne'mine ikevo lulo lemo do hongu lo-ledaa' neine' O'moso ne'mo nene lengikisi mine molo minelive. 12 Lingine nene O'moso'mi evenelelite ilizado' o minine' monovolo' nene igi ge nabuti' ize ne gabuti' ize li minaa' ilo. Ido' O'moso'mi evenele muki' nete nene longopo'ni nilave.

13 Guvelesi ve Izesu' Kilisito' nasahili've nene lengikisi mine molo neivo O'moso'mi lulo nesi lengita neivo ido' O'moso'mi Sikalahuli'mo nene lengikisi bizo minaavo minilizahoo lo noluve.

Modave.